Канон преподобному Иову Почаевскому

Память празднуем 28 октября (10 ноября)

Тропарь, глас 4-й

Многострадальнаго праотца долготерпение стяжав, Крестителеву воздержанию уподоблялся, Божественныя же ревности обою приобщаяся, тех имена достойно прияти сподобился еси и истинныя веры был еси проповедник безбоязнен; темже монахов множества ко Христу привел еси, и вся люди в Православии утвердил еси, Иове преподобне отче наш, моли спастися душам нашим.

КАНОН, глас 8-й

Песнь 1

Ирмос: Посеченный несекомаго пресече, и виде солнце землю, юже не виде; лютаго врага вода потопи, и непроходимое пройде Израиль; песнь же воспевашеся: Господеви поим, славно бо прославися.

Припев: Преподобне отче наш Иове, моли Бога о нас.

Ангела земнаго и Небеснаго человека, Иова преподобнаго, Волынскую похвалу, достойно воспети помози ми, Слове Божий, презирая моя прегрешения и подавая слово устом моим.

Преподобне отче наш Иове, моли Бога о нас.

Был еси, преподобне, воистинну миру светильник пресветел, всем путь спасения показуяй; темже и мне буди помощник, во еже прославити житие твое и умиление стяжати.

Преподобне отче наш Иове, моли Бога о нас.

В дому родителей твоих первее познал еси Господа, Иове славне, и, отрок сый, разум совершен показал еси, егда монашеское житие изволил еси, вся же житейская провидев, Единаго Бога возлюбил еси.

Преподобне отче наш Иове, моли Бога о нас.

Горе очи твои и душу вознося, во обители Угорництей братию в Богоугоднем житии скоро превозшел еси, хуждша всех себе помышляя и тем лучший Иисусу являяся, старцем же и юным образ быв прелюбезнейший.

Слава: Добре тя на диаволы воинствовавша помышляя, преподобне, своея стыждуся лености и множества грехов моих ужасаюся: но твоими, святе, молитвами даруй ми желание благое, во еже прочее время жития моего в покаянии скончати.

И ныне: Яко Божия Мати дерзновение имущи к рождшемуся из Тебе Единородному Слову, и Отцу Собезначальному, и Соестественному Духу молящи не престай от бед спасти, Всенепорочная, Тя, Богородицу, славящия.

Песнь 3

Ирмос: Утвердися сердце мое во Господе, вознесеся рог мой в Бозе моем, разширишася на враги моя уста моя, возвеселихся о спасении Твоем.

Преподобне отче наш Иове, моли Бога о нас.

Есть во мне, отче преподобне, добраго исправления желание, но искушения лености побеждати не навыкох, увы мне. Обаче на помощь твою надеяся, уныния помыслы отгоняю, на твоя же взираю славныя подвиги.

Преподобне отче наш Иове, моли Бога о нас.

Железо наречеся род твой, Иове преподобне, крепость души твоея предуказуя; в пещере же каменне заключився, яко злато сокровено, освятил еси место подвиг твоих и гору Почаевскую, яко стену медяну, противу врагов Православия явил еси.

Преподобне отче наш Иове, моли Бога о нас.

Зело углубишася помышления твоя яже о Небеснем Царствии, егда, еще отрок сый, Ангельский образ восприял еси; темже и священник быв Богу верен, даже ныне моления о людех возносиши, Иове преподобне.

Преподобне отче наш Иове, моли Бога о нас.

Земля Галицкая юностию твоею славится, и Дубенская обитель мужеския подвиги твоя благовествует, обитель же Почаевская старостию твоею хвалится и блаженною кончиною веселится, вся же вселенная о чудесех твоих радуется и ликовствует.

Слава: Иже подаеши благая всем, молящимся тебе, и мене припадающа не отрини, святче, но, покаяние мое зря, даждь ми жития исправление, ревность же вдохни, еже подражати твоим Боголюбивым деянием.

И ныне: Умерщвленный мой ум животным действом из Тебе, Явльшимся миру, воздвигни, Чистая, и к жизни настави, Яже смерти двери разоршая Едина Рождеством Твоим.

Господи, помилуй (трижды).

Седален, глас 8-й

Днесь исполняется радости обитель Почаевская, твое Боголюбивое житие прославляющи; днесь христоименитии людие ревностию спасения просвещаются, зряще нетлением прославленные мощи твоя, преподобне; днесь греховныя отгоняются страсти, и помыслы покаяния души наша объемлют, в нихже утверди всех, преславне, верно почитающих память твою.

Слава, и ныне: Яко Всенепорочная Невеста Творца, яко Неискусомужная Мати Избавителя, приятелище яко сущи Утешителя, Всепетая, беззакония мя суща скверное обителище и демонов игралище в разуме бывша, потщися от тех злодейства мя избавити и светлое жилище добродетелей соверши, Светоносная Нетленная, отжени облак страстей, и Вышняго причастия сподоби, и Света Невечерняго молитвами Твоими.

Песнь 4

Ирмос: Пророк Аввакум умныма очима провиде, Господи, пришествие Твое, тем и вопияше: от юга приидет Бог. Слава силе Твоей, слава снизхождению Твоему.

Преподобне отче наш Иове, моли Бога о нас.

Иове преподобне, о всех молитвенник буди теплый, твоему заступлению верующих, свое же окаявающих житие и на Божие милосердие уповающих, аще и прельщеньми жития сего влающихся.

Преподобне отче наш Иове, моли Бога о нас.

Кто от человек не подивится долготерпеливому житию твоему, отче, кто ли не прославит твоей о Православии ревности, ты бо, яко адамант крепок, еретиком противостал еси, и истинныя веры проповедание словесы же и писаньми всем преподал еси.

Преподобне отче наш Иове, моли Бога о нас.

Льва рыкающа и ищуща поглотити души спасаемых молитвою твоею победил еси, отче, но и тому служащия люди в покаяние приводил еси, тати милосердием твоим постыждая и вразумляя, грабители же обличеньми устрашая и вся научая спасительному покаянию.

Слава: Мрак души моей, отче, предстательством твоим разсей и светом заповедей Господних просвети мое окаянное сердце, да и аз, твоим учеником последуя, тех части лишен не пребуду, твою восхваляя святую память.

И ныне: Бога, из Тебе воплощеннаго, моли непреложно, Еже бе пребывша и естественно равна Отцу, и Духу сопрестольна, прощение прегрешений и душ спасение поющим Тя верою даровати.

Песнь 5

Ирмос: Мрак души моея разжени, Светодавче Христе Боже, началородную тьму изгнав бездны, и даруй ми свет повелений Твоих, Слове, да, утренюя, славлю Тя.

Преподобне отче наш Иове, моли Бога о нас.

Наш еси воистинну предстатель и чудотворец пресветлый, взываше Дионисий, обретый мощи твоя, тлению непричастны. Мы же, сия лобызающе, вопием: наших скверн не возгнушайся, угодниче Божий, но твоими молитвами сия очисти.

Преподобне отче наш Иове, моли Бога о нас.

Оправданием Божиим от юности, отче, научаемь, суеты житейския уклонитися крепко возжелал еси, безмолвие же возлюбил еси: обаче велению Христову не противляяся, притекающия к тебе правому исповеданию и евангельскому житию научил еси.

Преподобне отче наш Иове, моли Бога о нас.

Предстатель явился еси и по преставлении твоем страждущим и скорбящим человеком: тако бо тя видеша людие, из гроба твоего исходяща и со Ангелы посреде церкве молящася. О, чудо преславное воистинну! О, радость верным и утверждение!

Преподобне отче наш Иове, моли Бога о нас.

Рачитель быв Небеснаго Царствия, о своем тамо вхождении извествуешися и кроме болезни и страха пресельник являешися лучшия жизни, братии же твоея учитель и упование.

Слава: Сопутник житию моему буди, отче Иове, молитвою твоею ограждай многомятежную мою душу и введи ю в Небесное Царство, твоими умиленную подвиги, Христу же покаянныя приносящую слезы.

И ныне: Тя стену имуще и предстательством Твоим соблюдаеми, Твоею Божественною славою хвалящеся, Тя блажим: Ты бо, Всечистая, душам нашим источаеши веселие и радование.

Песнь 6

Ирмос: Иону в ките, Господи, единаго вселил еси, мене же связана мрежами вражиими, яко от тли онаго спаси.

Преподобне отче наш Иове, моли Бога о нас.

Твердое упование на предстательство твое возлагаю, преподобне, и верою молюся: даждь ми страстей лютых одоление, смерти же непрестанную память и блаженства желание грядущаго века.

Преподобне отче наш Иове, моли Бога о нас.

Утверждается тобою, преподобне, Святая Церковь, ересь же всякая посрамляется, обличение имущи твоя многоцелебныя мощи, и жития твоего столетняго труды, и болезни, и слезы, и пост, и плоти от костей отпадение.

Преподобне отче наш Иове, моли Бога о нас.

Фараона мысленнаго побеждаше Иов преподобный, послушанию всегда прилежа и обуреваемым на помощь приходити не отрицаяся: и тако три обители учением своим просветив и подвиги многими прославив, веселяше Спаса всех, Человеколюбца.

Преподобне отче наш Иове, моли Бога о нас.

Христову смирению подражаше Иов, егда начальство яко служение всем прият и, игумен сый, в тяжких службах подвизашеся, братии же бяше образ кротости, и трудолюбия правило, и о молитве присное напоминание.

Слава: От скверных избави мя страстей твоими молитвами, тех одоление мне подавая Божественныя помощи присным призыванием, и на себе ненадеянием, и брата моего неосуждением.

И ныне: Вознесла еси всеистинно падшее человеческое существо во зраце Божественнем, и Отца в равенстве видимаго Сына Неизменнаго, Богомати, без семене во чреве поносивши.

Господи, помилуй (трижды). Слава, и ныне:

Кондак, глас 4-й

Явился еси истинныя веры столп, Евангельских же заповедей ревнитель, гордыни обличение, смиренным же предстатель и научение: темже и ублажающим тя грехов отпущение испроси и обитель твою невредиму сохрани, Иове отче наш, Многострадальному подобный.

Икос

Отверзи уста твоя, пещеро каменная, и рцы нам, колькраты токи слез Иовлих омочилася еси, како того воздыхания твоих стен не расторгоша, како, Свет Божественный тебе не сожже, како Ангели бденным подвигом Иовлим дивишася, теми бо освятися земля Галицкая и Волынская; мы же, сия вся помышляюще, слезами умиления очи наши исполняем: есть бо преподобный Иов угодник дивный, Многострадальному подобный.

Песнь 7

Ирмос: На поле Деире иногда мучитель пещь постави на мучение Богоносных, в нейже три отроки песнословяху Единаго Бога, троично воспеваху, глаголюще: отцев Боже, благословен еси.

Преподобне отче наш Иове, моли Бога о нас.

Люди православныя, тя блажащия, преподобне Иове, укрепи на враги и о Церкви мирная глаголи в сердце их, всем единомыслие испроси у Бога, и друг ко другу любовь, и о Православии ревность.

Преподобне отче наш Иове, моли Бога о нас.

Чашу жития Твоего пити, Господи, не могу аз, окаянный, боязнию скорбей обуреваемь и страстей сплетаемь тернием, обаче молюся: Иова, Твоего угодника, молитвами помилуй мя и помози ми греховную отрясти леность.

Преподобне отче наш Иове, моли Бога о нас.

Широкий путь, погибель души предносящий, возненавидев, Иове преподобне, в тесней пещере заключился еси и теснаго пути жизни в начальстве твоем не уклонился еси, день и нощь в молитве и трудех пребывая и научение здравое всем приходящим к тебе подавая.

Слава: Щедр был еси нищим, кающимся же милостив и научения требующим учитель кроток, Божественныя же мудрости любитель и Евангельских заповедей проповедник, книг же Божественных издатель и ереси безбоязненный обличитель.

И ныне: Марию Пречистую и Всесвятую восхвалим: Тою бо благодать нам источается паче ума даров, яко от потока Божественныя благости, Юже благочестивым помыслом ныне ублажаем.

Песнь 8

Ирмос: Покрываяй водами превыспренняя Своя, полагаяй морю предел песок и содержай вся, Тя поет солнце, Тя славит луна, Тебе приносит песнь тварь, яко Содетелю всех во веки.

Преподобне отче наш Иове, моли Бога о нас.

Едущим и идущим во обитель твою безчисленным людем, ко твоим же мощем припадающим, буди дарований духовных податель, телесных же болезней целитель и пред Спасом теплый о всех предстатель, Иове, земли Волынския славо и украшение.

Преподобне отче наш Иове, моли Бога о нас.

Юноша телом, но старец умом в начале монашескаго жития твоего был еси, отче: состаревся же плотию, юношескую бодрость в трудех являл еси, земли копанием и древес насаждением образ всем смиренномудрия подавая.

Преподобне отче наш Иове, моли Бога о нас.

Явление твое со Ангелы вкупе смиренную деву ужасаше, здравие же ученику твоему подаваше и вся люди на славословие Богови воздвизаше, истинную же утверждаше в них веру и еретическая отреваше нападения.

Слава: Фимиамом молитв твоих и мене облагоухай, Иове преславне, моих грехов злосмрадие тем отгоняя и упование на Господа вселяя в мою смрадную душу, да благодатию Божиею очищаемь, воспою твое, преблаженне, крепкое заступление.

И ныне: Богородительнице Всечистая, души моея язвы и греховныя струпы очисти, источником омывающи сущим из ребр Сына Твоего, и потекшими из тех, очищающи, струями: к Тебе прибегаю и Тя призываю, Богоблагодатную.

Песнь 9

Ирмос: Благословен Господь, Бог Израилев, воздвигнувый рог спасения нам в дому Давидове, отрока Своего, в нихже посети нас Восток с высоты и направил ны есть на путь мира.

Преподобне отче наш Иове, моли Бога о нас.

Иссопом благодати Божия окропи сердца наша, Иове преподобне, твоим святым мощем покланяющихся, да твоея ревности о вере причастившеся, ко исполнению заповедей Христовых добре потщимся.

Преподобне отче наш Иове, моли Бога о нас.

Псаломски взывати к Богу на земли не преставал еси, и девства твоего сосуд соблюл еси: темже на Небеси райския воспеваеши ныне песни со Ангелы и всеми святыми, люди же, на земли трудящияся, от Вышних назираеши.

Преподобне отче наш Иове, моли Бога о нас.

О, колика жития твоего нетленная красота, о, колика по смерти твоей чудеса и исцеления! Се бо земная оставив, воистинну сторицею Небесная блага еще в житии, паче же во грядущем, по глаголу Христову стяжал еси.

Слава: О, колико грехов наших множество! Но сия превосходит твоих молитв крепость, ихже не лиши нас, отче преподобне Иове, друже Христов и святых всех сопричастниче, церковный столпе и о душах человеческих предстателю теплейший.

И ныне: Зачала еси, Дево, без семене, всяческая создавшаго Слово Божие, кроме хотений плотских, и без истления родила еси, без болезней матерних. Тем Тя, Богородицу, и языком, и сердцем исповедающе, величаем.

Распечатать эту страницу